Н.Энхбаяр: Бид шударга бусын хонгилоор орсон хүмүүсийн хувьд шударга ёсыг тогтооно

 Н.Энхбаяр: Бид шударга бусын хонгилоор орсон хүмүүсийн хувьд шударга ёсыг тогтооно

УИХ-ын 2020 оны ээлжит сонгуулийг ирэх зургадугаар сарын 24-ний өдөр зохион байгуулахаар болсон билээ. Энэ удаагийн ээлжит сонгуульд 15 нам, дөрвөн эвсэл өрсөлдөхөө мэдэгдсэн юм. Тэгвэл өнөөдөр /2020.04.30/ Сонгуулийн ерөнхий хорооноос УИХ-ын 2020 оны ээлжит сонгуульд оролцох нам, эвслийн батламжийг нь гардуулж өглөө. Тухайлбал, МАХН болон ИЗНН, МУНН нэгдэж “Та бидний эвсэл”-ийг байгуулж, өнөөдөр сонгуульд өрсөлдөх батламжаа гардаж авлаа.

Энэ үеэр МАХН-ын дарга  Н.Энхбаяр “МАХН, ИЗНН, МУНН-аас эвсэл маань бүрдэж байна. Бид өнөөдөр 2020 оны УИХ-ын сонгуульд оролцох батламжаа албан ёсоор гардаж авлаа. Сонгуулийг шударга болоосой гэж  хүсч байна. Ард түмэн маань ч шударга, ухамсартай, зөв сонголтыг хийж оролцоосой. Энэ сонгууль амжилттай болвол нийгэмд тогтсон МАНАН арилна.  Залуучууд маань  төр засагтаа итгэхээ больсон байна. Намуудаас юу ч хүлээхгүй байна. Тэднийг нийгэмд саарал масс гэж ярьдаг болсон байна. Тэгэхээр энэ сонгуулиар саарал масс байхаа болж, нийгмийг өөрчлөх боломжоо ашиглана гэж итгэж байна. Нөгөө талаар эрх баригчид Онц байдлын тухай хууль, Сонгуулийн хууль гэж байсаар атал цар тахалын хуулийг оруулж ирж баталлаа. Энэ хуулиар бидний сонгогчидтойгоо уулзах боломж бололцоог хумьж хааж байна. Өөрсдийн эрх ашигт нийцсэн сонгуулийг явуулахаар улайран зүтгэж эхэллээ.  Уг нь одоогийн байгаа Онцгой байдлын тухай хууль Монголд үүсээд байгаа нөхцөл байдлыг зохицуулах бүрэн боломжтой билээ. Ийм атал өөр нэгэн хуулийг оруулж ирж баталж байгааг бид шүүмжлэн хүлээн авч байна. Мөн энэ хууль нь жижиг дунд бизнес эрхэлж байгаа хүмүүст хүндээр тусна. Тэдний хөл гарыг хүлж байгаатай ялгаагүй хууль болсон. Үүнийг дагаад ажилгүйдэл, ядуурал, эдийн засгийн хямрал бий болно. Тэгэхээр манай эвсэл энэ хуулийн төслийг эсэргүүцэж байна. Нөгөө талаар бид шударга бусын хонгилоор орсон хүмүүсийн хувьд шударга ёсыг тогтооно. Улс орныхоо хөгжлийг түүчээлнэ. Байгалийн баялагийг ард түмэндээ авч өгнө, шүүхийг шүүх шиг болгоно гэсэн ийм том зорилтуудыг дэвшүүлж, 2020 оны УИХ-ын сонгуульд оролцож байна” гэсэн юм.

Холбоотой мэдээ

Leave a Reply

Таны и-мэйл хаягийг нийтлэхгүй. Шаардлагатай талбаруудыг *-р тэмдэглэсэн