“Улаанбаатар марафон”-2022 болоход гурав хоног үлдлээ

 “Улаанбаатар марафон”-2022 болоход гурав хоног үлдлээ

Улаанбаатар марафон-2022” олон улсын гүйлтийг тавдугаар сарын 28-ны бямба гарагт Улаанбаатар хотод зохион байгуулна. Олон улсын марафон гүйлтийг хэрхэн зохион байгуулах талаар хэвлэлийн бага хурал хийж, мэдээлэл өгөв. Хэвлэлийн хуралд Нийслэлийн Нийгмийн бодлогын хэлтсийн дарга И.Баатархүү, Нийслэлийн Биеийн тамир, спортын газрын дарга  Ж.Ганболд, Нийслэлийн Нийтийн тээврийн газрын ахлах мэргэжилтэн А.Оргилсайхан, “Хай Пэймэнт Солюшнс” ХХК-ийн хөгжүүлэлт хариуцсан захирал А.Сүхбат  нар оролцлоо.

КЕНИ, КАЗАКСТАН УЛСЫН МЭРГЭЖЛИЙН ТАМИРЧИД МАРАФОНД ОРОЛЦОНО

НЗДТГ-ын Нийгмийн бодлогын хэлтсийн дарга И.Баатархүү:

-“Улаанбаатар марафон-2022” олон улсын гүйлт нь Монгол Улсад гүйлтийн спортыг хөгжүүлэх, гүйлтээр хичээллэгсдийн тоог нэмэгдүүлэх, өсвөр залуу үеийнхэнд бие бялдар, оюун санааны өв тэгш хүмүүжлийг төлөвшүүлэх, иргэд өдөр тутам биеийн тамир, спортоор хичээллэх идэвх санаачилгыг нэмэгдүүлэх зэрэг олон талын ач холбогдолтой уралдаан юм. Энэ жилийн уралдаанд гадаадын 15 орны 80 гаруй тамирчин оролцохоор  мэдүүлгээ өгсөн. Тэр дундаа бүтэн марафоны төрөлд Кени, Казакстан улсаас тус бүр хоёр мэргэжлийн тамирчин оролцохоор урилга авч, визээ гаргуулаад, манай улсыг зорин ирж байгаа юм. Марафонд оролцогчид 5000 м, 10000 м, хагас болон бүтэн марафонд гүйх юм. 10 км, 21 км, 42 км-т гүйх оролцогчдын амжилтыг олон улсын жишгээр автомат чипээр тодорхойлно. Тиймээс тамирчдын хувийн мэдээллийг урьдчилан цахим программд оруулах шаардлагатай тул оролцогчдыг тавдугаар сарын 27-ныг хүртэл  бүртгэнэ. Маргааш, нөгөөдөр буюу тавдугаар сарын 26, 27-нд бүртгүүлсэн иргэдэд “Хай Пэймэнт Солюшнс” ХХК-аас энгэрийн тэмдэг, чипийг тарааж өгнө.

Түүнчлэн “Улаанбаатар марафон-2022” гүйлт болох өдрийг нийслэлд “Автомашингүй өдөр” болгосон. Аль замуудын хөдөлгөөнийг хязгаарлах талаарх мэдээллийг www.ulaanbaatar.mn сайт, “Нийслэлийн мэдээ” пэйж хуудаснаас үзэх боломжтой.  Марафоны нээлт 09:30 цагаас Сүхбаатарын талбайд болно. Нээлтийн өмнө урлагийн тоглолт болж, нээлтэд нэр хүндтэй тамирчид оролцох юм гэлээ.

БҮРТГЭЛИЙГ ХОЁР СУВГААР ХИЙЖ БАЙНА

“Хай Пэймэнт Солюшнс” ХХК-ийн хөгжүүлэлт хариуцсан захирал А.Сүхбат “Бүртгэлийг хоёр сувгаар хийж байна. Тухайлбал, вэб сайтаар буюу www.ubmarathon.hipay.mn сайт руу нэвтрэн гүйх төрлөө сонгон бүртгүүлэх боломжтой. Түүнчлэн HiPay аппликэйшнээр дамжуулан бүртгүүлж болно. Төлбөрийн хувьд онлайнаар бүх банкны картаар болон HiPay аппликэйшнээр QR код уншуулан төлбөр төлөх боломжтой” гэсэн юм. Марафонд оролцогч иргэдийн  бүртгэл тавдугаар сарын 27-ныг дуустал үргэлжлэх бол мэргэжлийн тамирчдын тухайд тавдугаар сарын 27-ны дотор бүртгүүлэх учиртай.

НИЙТИЙН ТЭЭВРИЙН 39 ЧИГЛЭЛД ӨӨРЧЛӨЛТ ОРНО

Нийслэлийн Нийтийн тээврийн газрын ахлах мэргэжилтэн А.Оргилсайхан “Тавдугаар сарын 28-нд 06:00-18:00 цагт “Улаанбаатар марафон” зохион байгуулж, авто зам хаахтай холбоотойгоор нийтийн тээврийн 39 чиглэлийн 432 тээврийн хэрэгслийн чиглэлд өөрчлөлт орно. Энхтайваны өргөн чөлөө, Баруун 4 замаас Зүүн 4 зам, Их Тойруу, Бага Тойруугийн авто замыг хааж байгаа учир Их тойруугаар явах чиглэлүүд Баянбүрд, Үндэсний шуудан, Сансарын ШТС-ын нийтийн тээврийн зогсоол, Нарны замаар явах чиглэлүүд Жигүүр гранд, Замын цагдаагийн газар, Миний дэлгүүр нийтийн тээврийн зогсоолын чиглэлд зорчих юм. Босоо чиглэл буюу хойноос урагш явах чиглэлүүд Ногоон нуур, 120 мянгат, Төв цэнгэлдэх хүрээлэн нийтийн тээврийн зогсоол, Баруун 4 замыг дайран өнгөрөх чиглэлүүд МҮЭСТО, Элба төв, Бөмбөгөр худалдааны төв, Нарны титмийн нийтийн тээврийн зогсоол, Зүүн 4 замыг дайран өнгөрөх чиглэлүүд Сансарын үйлчилгээний төв, Хавдар судлалын эмнэлгийн нийтийн тээврийн зогсоолуудаар иргэдэд үйлчилнэ. Нийтдээ 39 чиглэлд өөрчлөлт орж байгаа учраас энэ талаарх мэдээллийг  www.ulaanbaatar.mn сайт, “Нийслэлийн мэдээ”, Нийтийн тээврийн газрын пэйж хуудас, иргэдийн UB Smart Bus аппликэйшнээр аван, зорчих боломжтой юм” гэв.

“УЛААНБААТАР МАРАФОН” БОЛ ОЛОН УЛСЫН ХЭМЖЭЭНИЙ ҮЗҮҮЛЭЛТ ӨНДӨРТЭЙ ТЭМЦЭЭН

Хэвлэлийн хурлын үеэр Нийслэлийн Биеийн тамир, спортын газрын дарга Ж.Ганболд сэтгүүлчдийн асуултад хариулахдаа “Улаанбаатар марафон” бол олон улсын хэмжээний үзүүлэлт өндөртэй тэмцээн. Тиймээс ч  жил болгон гадаадын улс орны тамирчид оролцдог онцлогтой. Гүйлтийг  таван төрлөөр зохион байгуулна. Зай маршрутын тухайд 42 км, 21 км-ийн хагас бүтэн марафон, 10 км-ийн марафонд 18-аас дээш, 18-34, 35-54, 55-аас дээш гэсэн насны ангиллаар явагдана.  Мөн 10 мянган метрийн марафонд 18-аас дээш насныхан, 5000 метрт 12-17, 18-аас дээш насныхан оролцох боломжтой. Энэхүү эрүүл мэндийн гүйлтэд манай марафонд оролцогчдын олонх нь оролцдог. Дээрээс нь 1500 метрийн гүйлтэд гэр бүлийн болон хөгжлийн бэрхшээлтэй тамирчид оролцох боломжтой. Гүйлтэд оролцогчдын хураамж 5000-60.000 төгрөгт хэлбэлзэж байгаа. Олон улсын марафон гүйлтийн жишиг ийм байдаг” хэмээн тодотгосон юм.

Гүйлтийг 42 км, 21  км-ийн зайд 18-34, 35-54, 55-аас дээш насны ангиллаар зохион байгуулна. Харин  эрүүл мэндийн гүйлт буюу 5 км-ийн зайд 12-17 нас, 18-аас дээш насныхан оролцох бол  1.5 км-ийн зайд  гэр бүлээрээ болоод  тусгай хэрэгцээт иргэд оролцох боломжтой юм.  Марафоны зам маршрутыг тогтоон баталгаажуулж, гараа, барианы болон ус эмнэлэг, үйлчилгээний цэгүүдийг байгуулаад байгаа юм. “Улаанбаатар марафон-2022” олон улсын  гүйлтэд оролцогчдын тоо жилээс жилд өсөн нэмэгдэж байгаа юм. Хамгийн анх  2014 онд  16.839 иргэн оролцож байсан бол  2015 онд 18.085, 2016 онд 25.000, 2017, 2018 онуудад 30.000-д хүрчээ.  Харин 2019 оноос  нийслэлийн иргэдээс гадна хөдөө, орон нутаг, Монгол Улсад ажиллаж, амьдарч байгаа гадаадын иргэд, хөрш зэргэлдээ орны гүйлт сонирхогчид болон олон улс, тив, дэлхийд танигдсан нэртэй тамирчид зэрэг 32.000 гаруй хүнийг хамруулан амжилттай зохион байгуулсан. Харин 2020, 2021 онд дэлхий нийтийг хамарсан цар тахлын улмаас марафон гүйлт завсарлахад хүрчээ. Энэ жилийн хувьд урьд өмнөхөөс ч өргөн дэлгэр болох магадлалтайг зохион байгуулагчид онцолж байлаа.

НИЙСЛЭЛИЙН СУРГАЛТ, СУДАЛГАА, ОЛОН НИЙТТЭЙ ХАРИЛЦАХ ГАЗАР

Холбоотой мэдээ

Leave a Reply

Your email address will not be published.