Улаанбаатар хотын шинэ бүтээн байгуулалт компани байгууллаа

 Улаанбаатар хотын шинэ бүтээн байгуулалт  компани байгууллаа

НИТХ-ын ээлжит бус V хуралдаан боллоо. Хурлаар Улаанбаатар хотын шинэ бүтээн байгуулалт ХХК байгуулах тухай асуудлыг Нийслэлийн Засаг даргын Авто замын түгжрэлийг бууруулах болон зам, тээврийн асуудал хариуцсан орлогч Б.Одсүрэн танилцуулж, хэлэлцүүлэв.

Улаанбаатар хотын авто замын сүлжээг өргөтгөх, тойрог замыг бий болгох, нийтийн тээвэрт шинэчлэл хийх, багтаамж ихтэй нийтийн тээврийн хэрэгслийг нэвтрүүлэх төсөл, арга хэмжээг удирдлага, зохион байгуулалтаар хангах, хурдан шуурхай хэрэгжүүлэх зорилгоор тус компанийг байгуулахаар болжээ. Компани нь Нийслэлийн Засаг дарга бөгөөд Улаанбаатар хотын Захирагчийн шууд удирдлаган доор үйл ажиллагаа явуулах юм.

Намын бүлгийн гишүүд нийслэл Улаанбаатар хотын түгжрэлийг шийдэхэд хувь нэмэр оруулах Улаанбаатар хотын шинэ бүтээн байгуулалт ХХК байгуулахыг дэмжиж, харин явцын үр дүнг бодит гүйцэтгэлээр баталгаажуулж, санхүүгийн тайлан, гүйцэтгэлийг иргэдэд нээлттэй мэдээлэхийг хүслээ. Мөн НИТХ-ын төлөөлөгчид төвлөрлийг задалж, түгжрэлийг бууруулах, дэд бүтцийг сайжруулах зорилготой тус компанийг байгуулах ёстойг дурдаад, зорилтоо тодорхойлж, шуурхай ажиллах хэрэгтэйг хэлж байв.

НИТХ-ын төлөөлөгчид 100 хувийн саналаар Улаанбаатар хотын шинэ бүтээн байгуулалт ХХК байгуулахыг дэмжив.

Эмээлт эко аж үйлдвэрийн парк болгон нэр, дүрмийг өөрчлөв

 “Эмээлтийн хөнгөн үйлдвэрийн үйлдвэрлэл, технологийн парк” ОНӨТҮГ-ын нэр, дүрмийг шинэчлэн батлуулах тухай асуудлыг Нийслэлийн Засаг даргын Барилга, орон сууц, үйлдвэр, технологийн паркийн асуудал хариуцсан орлогч Б.Сүхбаатар танилцууллаа.

Тэрбээр Эмээлтийн хөнгөн үйлдвэрийн үйлдвэрлэл, технологийн парк ОНӨТҮГ нь 2014 онд байгуулагдсан. Энэ хугацаанд үерийн усны барилга байгууламж, борооны ус цуглуулах төв шугамын зураг төсөв, паркийн хамгаалалтын бүсийн зураг төсөв, паркийн дотор инженерийн шугамын зураг төсөв, технологийн усан хангамжийн зураг төсөв, гидрогеологийн  судалгаа зэрэг ажлыг гүйцэтгэж ирсэн. Тус газрыг Эмээлт эко аж үйлдвэрийн парк нийслэлийн өмчит аж ахуйн тооцоотой үйлдвэрийн газар болгон өөрчлөн байгуулах санал гаргаж, дүрмийг шинэчлэн боловсрууллаа. Ингэснээр дэлхийн жишигт нийцсэн хөдөө аж ахуйн паркийг байгуулах замаар Улаанбаатар хотын төвлөрлийг сааруулах, эдийн засгийн өрсөлдөх чадвар, ажлын байрыг нэмэгдүүлэх, экспортын чиг баримжаатай бараа, бүтээгдэхүүн үйлдвэрлэх юм” хэмээв.

Эко парк нь бизнес инкубатор, үйлдвэр сургалтын төв, тээвэр, хөнгөн үйлдвэр, худалдааны төв, агуулахын аж ахуй, газар тариалан, мал аж ахуй, ойн аж ахуй, төсөл, хөтөлбөр хэрэгжүүлэх, судалгаа үнэлгээ хийх зэргээр үйл ажиллагаа явуулах юм.

Эмээлтийн хөнгөн үйлдвэрийн үйлдвэрлэл, технологийн парк ОНӨТҮГ-ыг Эмээлт эко аж үйлдвэрийн парк НӨААТҮГ болгон өөрчлөхийг НИТХ-ын төлөөлөгчид 100 хувийн саналаар дэмжин баталлаа.

НИЙСЛЭЛИЙН СУРГАЛТ, СУДАЛГАА, ОЛОН НИЙТТЭЙ ХАРИЛЦАХ ГАЗАР

Холбоотой мэдээ

Leave a Reply

Your email address will not be published.