Төсвийн хөрөнгөөр барилга барьж буй 200 гаруй компани Төрийн гурван өндөрлөг, УИХ-ын гишүүдэд хугацаат шаардлага хүргүүллээ

 Төсвийн хөрөнгөөр барилга барьж буй 200 гаруй компани Төрийн гурван өндөрлөг, УИХ-ын гишүүдэд хугацаат шаардлага хүргүүллээ

Цар тахлын нөхцөл байдал, эдийн засгийн хүндрэл болон бараа материалын үнэ өссөн нь барилгын салбарт ачаа болж буй. 

Шат шатны онцгой комиссуудаас халдварын тархалтыг бууруулах зорилгоор хэрэгжүүлсэн арга хэмжээний нөлөөгөөр энэ онд улсын төсвийн хөрөнгөөр барилга барьж буй компаниуд ажлаа зургаадугаар сард эхлүүлжээ. Ийнхүү хугацаа алдаж эхэлсэн болон хил гаалийн хүндрэл, материалын үнэ өссөн зэрэгтэй холбоотойгоор одоогоор барилгын ажлаа зогсоохдоо тулаад байгаагаа 200 гаруй компанийн төлөөлөл өнөөдөр мэдэгдлээ. 

Төв аймагт үйл ажиллагаагаа явуулдаг барилгын компанийн захирал, Ажлын хэсгийн ахлагч н.Лхагвадорж “Одоогоор улсын хэмжээнд 400 гаруй объект үнийн өсөлттэй холбоотойгоор цаашид үргэлжлэх боломжгүй болж, зогсоход ойрхон байна. Үүний улмаас 200 гаруй компани, 500 гаруй ажлын байр, 50,000 хүний амьжиргаа хүнд нөхцөл байдалд орохоор байгаа юм.

Иймд Төрийн гурван өндөрлөг, УИХ-ын гишүүд болон Сангийн сайд Б.Жавхлан нарт хугацаатай шаардлага хүргүүлж байгаа” гэв.

Шаардлагад 

  1. Үнийн бодит өсөлтийн индексийг тооцож, төсвийн зөрүүг 2022 оны төсвийн тухай хуульд тусгах, төрийн болон төрийн бус байгууллагын төлөөлөл, аж ахуйн нэгжээс бүрдсэн ажлын хэсэг байгуулах,
  2. 2021 оноос өмнөх барилгын ажлуудад үнийн өсөлтийн зөрүүг тооцож, 2022 оны төсөвт суулгах. 2022 оны улсын төсвийн тухай хуулийн төсөлд шинээр баригдахаар тусгагдсан барилга байгууламжийн төсөл арга хэмжээг дараа онуудын улсын төсөвт үе шаттайгаар суулгахаар хойшлуулах,
  3. Өмнөх онуудын төсөвт тусгагдсан улсын болон орон нутгийн хөрөнгө оруулалтаар хийгдэж буй ажлуудын санхүүжилтийг 2021 оны арванхоёрдугаар сарын 1-ний өдрөөс өмнө хариуцлагын гэрээ, хэлцлийн үндсэн дээр олгох асуудлыг яаралтай зохион байгуулах
  4. Үргэлжилж буй гэрээт ажлуудын гүйцэтгэлийн болон чанарын баталгааг цуцалж, гүйцэтгэгч компаниудад олгох
  5. Цар тахлын үед НӨАТ болон Нийгмийн даатгалын шимтгэлийн өр төлбөрийг нэг удаа чөлөөлж, дэмжлэг үзүүлэх гэжээ.

Уг шаардлагын хариуг аравдугаар сарын 13-ны өдрийн дотор ирүүлэхийг тэд шаардаж буй бөгөөд энэ хугацаанд хариу өгч, биелүүлэхгүй бол дараагийн шатны арга хэмжээг авна хэмээн мэдэгдлээ.

Холбоотой мэдээ

Leave a Reply

Таны и-мэйл хаягийг нийтлэхгүй. Шаардлагатай талбаруудыг *-р тэмдэглэсэн